व्हॉट्सअॅप, टिकटॉक, इन्स्टाग्रामवरून अफवा; ३५२ गुन्हे दाखल!

ई पेपर बीड
Spread the love

बीड : लॉकडाऊन सुरू झाल्यापासून व्हॉट्सअॅप, फेसबुक, इन्स्टाग्राम, ट्विटर, टिकटॉकवरून अफवा, खोट्या बातम्या पसरविल्याप्रकरणी ३५२ गुन्हे दाखल करण्यात आले आहेत. याप्रकरणी सायबर पोलिसांनी आतापर्यंत २११ जणांना अटक केली आहे. तसेच ऑडिओ आणि व्हिडिओ क्लिप मॉर्फिंग करून व्हायरल केल्याप्रकरणी ४३ गुन्हे दाखल करण्यात आले आहेत. लॉकडाऊनच्या काळात सायबर गुन्हे शाखेने असे एकूण ३९५ गुन्हे दाखल केले आहेत.
लॉकडाऊन सुरू झाल्यापासून नागरिकांना घाबरवणारे आणि त्यांची दिशाभूल करणारे मेसेज सोशल मीडियातून व्हायरल केले जात आहेत. याप्रकरणी सायबर पोलिसांनी गुन्हे दाखल केले असून त्यात व्हॉट्सअॅपवरील १६९, फेसबुक १५४, टिकटॉक १८, ट्विटर ७ आणि इन्स्टाग्रामवरील चार गुन्ह्यांचा समावेश आहे. तर ऑडिओ, व्हिडिओ क्लिप आणि यूट्यूब व्हिडिओ मॉर्फिंग करून त्याचा गैरवापर केल्याप्रकरणी ४३ गुन्हे दाखल करण्यात आले असून २११ लोकांना अटक करण्यात आली आहे.करोना व्हायरसशी एका विशिष्ट समुदायाचा संबंध असल्याचा टिकटॉक व्हिडिओ तयार केल्याप्रकरणी हिंगोलीत ७ गुन्हे नोंदवण्यात आले असून याबाबत अधिक तपास सुरू आहे. तर ८ ते १७ वयोगटातील तुमची मुलं सोसल मीडियावर काय सर्च करतात हे पाहा आणि चुकीच्या गोष्टींकडे मुलं वळू नयेत म्हणून सावध व्हा, असं आवाहन महाराष्ट्र सायबर गुन्हे शाखेने केलं आहे.